समाचार » दुम्सी ठानेर बन्दुक पड्काउँदा साथीको ज्यान गयो

धनकुटा, पुस २१ - शिकार खेल्न गएका दुईजना साथी मध्ये एउटाले दुम्सी सम्झेर गोली चलाउँदा अर्को साथीको ज्यान गएको छ । शनिबार राति शिकार खेल्न जंगलमा गएका वसन्तटार गाविस ४ बस्ने सुरेन्द्र लिम्बुले हानेको भरुवा बन्दुकको गोली लागि सोही ठाउँका २४ वषिर्य राजन लिम्बुको मृत्यु भएको हो ।
सुरेन्द्र र राजन दुवैजना भरुवा बन्दुक बोकेर वसन्तटार गाविस १ मा रहेको रमिते जंगलमा दुम्सीको शिकार गर्न गएका थिए । इलाका प्रहरी कार्यालय राजारानीका प्रहरी निरीक्षक सुरेन्द्रप्रकास श्रेष्ठले दिएको जानकारी अनुसार रातिको बेला दुइतिरबाट दुम्सीको खोजीमा रहेका बेला सुरेन्द्रले दुम्सी सम्झेर राजनमाथि गोली चलाएका थिए ।
दुईतिरबाट छेकेर मार्ने योजना अनुसार छुटि्टएका उनीहरुले नजिक आएको पत्तै नपाइ गोली चलाएका थिए । 'राति रुखका पोथ्रा हल्लेको देखियो, दुम्सीले हल्लाको ठानेर बन्दुक पड्काए । तर, आफनै साथी पो परेको बयानका क्रममा सुरेन्द्रले बताएको प्रहरी निरीक्षक श्रेष्ठले बताए । मध्य रातमा भएको सो घट्नापछि सुरेन्द्रले समेत आत्महत्या गर्ने प्रयास गरेका थिए ।
साथीलाई गोली हानेर मारेको भन्दै गाउँमा आएका सुरेन्द्रले आफैं प्रहरीमा आत्मसर्मपण गरेका थिए । प्रहरीले सुरेन्द्र र मृतक राजनले बोकेको दुईथान भरुवा बन्दुक बरामद गरेको निरीक्षक श्रेष्ठले जनाए ।

0 comments

Write Down Your Comment