समाचार » एमाओवादीलाई उप्रेतीको जवाफ-अरुलाई औंला उठाउँदा आफूतिर फर्किएला

८ मंसिर, काठमाडौं । प्रमुख निर्वाचन आयुक्त नीलकण्ठ उप्रेतीले संविधानसभा चुनावमा एक ठाउँमा पनि धाँधली नभएको दाबी गर्दै चुनावबारे औंलो नउठाउन एमाओवादीलाई चेतावनी दिनुभएको छ । ’एक ठाउँमा पनि धाँधली भएको छैन, तपाईहरुले कसैलाई एउटा औंलो उठाउँदा बुद्धले भनेजस्तो चार वटा औंलाहरु आफूतिर र्फकन सक्छन् भन्ने कुरा विचार गरिदिनुहोला’ शनिबार निर्वाचन आयोगमा आयोजित पत्रकार सम्मेलनमा उप्रेतीले भन्नुभयो- ‘एउटा पनि गडगडी भएको छैन, त्यस्तो देख्नुभएको छ भने प्रमाण लिएर आउनोस् ।
एकीकृत नेकपा माओवादीले चुनावमा धाँधली भएको र मतपेटिका साटफेर गरिएको आरोप लगाइरहेका बेला निर्वाचन आयोगले शनिबार कार्यालयमा पत्रकार सम्मेलन गरेर एमाओवादी आरोपको खण्डन गरेको हो । प्रहरी कार्यालयमा मतपेटिका भेटिएकोबारे पत्रकारले सोधेको प्रश्नमा प्रमुख आयुक्त उप्रेतीले निर्वाचन आयोगले निर्वाचन सामाग्रीहरु मतदान हुने स्थल नजिक सुरक्षा निकायकै पहलमा मतपेटिका राख्ने प्रचलन पुरानै रहेको बताउनुभयो । मतपेटिकाहरु पसलमा राख्न नमिल्ने भएकाले सरकारी भवन र सुरक्षा निकायका कार्यलयहरुमै राखिने उहाँले बताउनुभयो ।
मतदान एवं मतगणना कार्य गर्दाखेरि पुरानो प्रचलन अनुसार दलका प्रतिनिधिहरुकै रोहवरमा, उनीहरुलाई देखाएर र उनीहरुको हस्ताक्षरका आधारमा मात्रै गरिएको हुनाले धाँधलीको आरोप लगाउन नमिल्ने उहाँले बताउनुभयो । निर्वाचन प्रक्रियाप्रति चित्त नबुझे संविधानसभा अदालतमा उजुरी गर्ने प्रावधान रहेको उप्रेतीले बसम्झाउनुभयो ।
काठमाडौं ४ निर्वाचन क्षेत्रबाट एमाओवादी उम्मेद्वार पासाङबाट परेको उजुरीमा कुनै निश्चित क्षेत्रको नभई समग्र क्षेत्रको धाँधली भएको भनिएकाले त्यसमा खासै सुनुवाइ गर्नु नपरेको उहाँले बताउनुभयो । मतगणनाका बेला मतपेटिकाको सील समेत दलका प्रतिनिधिकै रोहवरमा तोडिएको उहाँले बताउनुभयो ।
मतगणनाका बेला कसैलाई बाहिर जान मन लाग्दा जान पाउने र हार्नेजस्तो देखेपछि कोही बाहिर जाँदैमा मतगणना नरोकिने उहाँले बताउनुभयो । अहिलेको निर्वाचन निश्पक्ष भएको बताउनुभयो । समानुपातिकतर्फको नतिजा आउन अझै एकसाता लाग्ने उहाँले बताउनुभयो ।

0 comments

Write Down Your Comment