समाचार » मन्त्रीको सम्पति विवरण सार्वजनिक गर्न अझै केही दिन लाग्ने

 काठमाडौ, फाल्गुन २९ - सरकारले डा. प्रभाकरकुमार पाठक, अनुपकुमार उपाध्याय, हरिकुमार श्रेष्ठ, नारायणप्रसाद रेग्मी, मधुप्रसाद रेग्मी र भोलाप्रसाद सिवाकोटीलाई सचिवमा बढुवा गर्ने निर्णय गरेको छ ।

मन्त्रिपरिषद्को आजको बैठकले सो निर्णय गरेको सूचना तथा सञ्चार मन्त्री एवम् सरकारका प्रवक्ता डा. मीनेन्द्र रिजालले जानकारी दिए ।

बैठकले सुपुर्दगीसम्बन्धी, सङ्गठित अपराध निवारण, निजामती सेवा तेस्रो संशोधन, नेपाल स्वास्थ्य सेवासहितका अध्यादेशलाई प्रतिस्थापन गर्ने विधेयकहरु संसदमा प्रस्तुत गर्ने निर्णय गरेको छ ।

मन्त्रिपरिषद्को १५ दिनअघि बसेको बैठकले मन्त्रीहरुको सम्पत्ति १५ दिनभित्र सार्वजनिक गर्ने भनेकामा अबको दुई/तीन दिनभित्र सबै मन्त्रीको सम्पत्ति सार्वजनिक गरिने मन्त्री डा. रिजालले बताए ।

“मन्त्रीहरुको सम्पत्ति विवरण मन्त्रिपरिषद्को कार्यालयमा बुझाउने क्रम लगभग सकिएको छ, बेग्लाबेग्लैभन्दा एकैचोटि सार्वजनिक गर्ने सोचअनुरुप दुई-तीन दिनभित्र वेबसाइटमार्फत सम्पत्ति विवरण सार्वजनिक हुन्छ,” मन्त्री डा. रिजालले भने ।

बैठकले सरकारको साझा न्यूनतम कार्यक्रम पनि परिमार्जनसहित पारित गरेको छ । सो कार्यक्रम सोमबारसम्म सार्वजनिक गर्ने तयारीमा सरकार छ ।

0 comments

Write Down Your Comment