पचासभन्दा बढी नीलगाई फेला

महोत्तरी,बैशाख१६– महोत्तरी जिल्लाको दक्षिण–पश्चिम सीमानाकामा अवस्थित इटहर्वाकट्टी गाविसमा आज एकैसाथ ५० भन्दा बढी नीलगाई फेला परेका छन् । दुर्लभ वन्यजन्तुका रुपमा रहेको नीलगाई सो गाविसको वनमा आज देखिएको स्थानीय बासिन्दाले बताएका छन् । यसअघि कहिले नदेखिएको गाईजस्तो तर नीलो रङका ती जनावर एक्कासि सो गाविसको वनमा आएपछि गाउँलेको ओइरो लागेको स्थानीयवासी अजय मण्डलले बताए ।

नीलगाईले तरकारीबालीमा प्रवेश गरेर सबै खाइदिएको स्थानीयवासी अवधेश कापरले बताउनुभयो । यसबारे स्थानीयवासीले जिल्ला प्रशासन तथा जिल्ला वन कार्यालयमा जानकारी गराइसकेका छन् । अहिले माथिल्लो जङ्गलमा डढेलो, चोरी सिकार जस्ता क्रियाकलापमा तीव्रता आएका कारण दुर्लभ वन्यजन्तु नीलगाई महोत्तरीको तल्लो क्षेत्रतिर आएको स्थानीयवासी बताउँछन् ।

Labels: समाचार